อเปตยํ จกฺขุมา เอกราชา, หริสฺสวณฺโณ ปถวิปฺปภาโส;
ตํ ตํ นมฺมสฺสามิ หริสฺสวณฺณํ ปถวิปฺปภาสํ, ตยาชฺช คุตฺตา วิหเรมุ รตฺติํฯ
เย พฺราหฺมณา เวทคู สพฺพธมฺเม, เต เม นโม เต จ มํ ปาลยนฺตุ;
นมตฺถุ พุทฺธานํ นมตฺถุ โพธิยา, นโม วิมุตฺตานํ นโม วิมุตฺติยา;
อิมํ โส ปริตฺตํ กตฺวา, โมโร วาสมกปฺปยีติฯ
โมรชาตกํ นวมํฯ
160. วินีลชาตกํ (2-1-10)
[19]
เอวเมว นูน [นุ (ก.)] ราชานํ, เวเทหํ มิถิลคฺคหํ;
อสฺสา วหนฺติ อาชญฺญา, ยถา หํสา วินีลกํฯ
[20]
วินีล ทุคฺคํ ภชสิ, อภูมิํ ตาต เสวสิ;
คามนฺตกานิ [คามนฺติกานิ (สี.), คามนฺตรานิ (ก.)] เสวสฺสุ, เอตํ มาตาลยํ ตวาติฯ
วินีลชาตกํ ทสมํฯ
ทฬฺหวคฺโค ปฐโมฯ
ตสฺสุทฺทานํ –
วรพลฺลิก ททฺทร สูกรโก, อุรคูตฺตม ปญฺจมภคฺควโร;
มหตีจมุ ยาว สิงฺคาลวโร, สุหนุตฺตม โมร วินีลํ ทสาติฯ
2. สนฺถววคฺโค
161. อินฺทสมานโคตฺตชาตกํ (2-2-1)
[21]
น สนฺถวํ [สนฺธวํ (ก.)] กาปุริเสน กยิรา, อริโย อนริเยน ปชานมตฺถํ;
จิรานุวุตฺโถปิ กโรติ ปาปํ, คโช ยถา อินฺทสมานโคตฺตํฯ
[22]
ยํ ตฺเวว ชญฺญา สทิโส มมนฺติ, สีเลน ปญฺญาย สุเตน จาปิ;
เตเนว เมตฺติํ กยิราถ สทฺธิํ, สุโข หเว สปฺปุริเสน สงฺคโมติฯ
อินฺทสมานโคตฺตชาตกํ ปฐมํฯ
162. สนฺถวชาตกํ (2-2-2)
[23]
น สนฺถวสฺมา ปรมตฺถิ ปาปิโย, โย สนฺถโว [สนฺธโว (ก.)] กาปุริเสน โหติ;
สนฺตปฺปิโต สปฺปินา ปายเสน [ปายาเสน (ก.)], กิจฺฉากตํ ปณฺณกุฏิํ อทยฺหิ [อทฑฺฒหิ (สี. สฺยา.), อทฏฺฐหิ (ปี.), อททฺทหิ (?)]ฯ
[24]
น สนฺถวสฺมา ปรมตฺถิ เสยฺโย, โย สนฺถโว สปฺปุริเสน โหติ;
สีหสฺส พฺยคฺฆสฺส จ ทีปิโน จ, สามา มุขํ เลหติ สนฺถเวนาติฯ
สนฺถวชาตกํ ทุติยํฯ
163. สุสีมชาตกํ (2-2-3)
[25]
กาฬา มิคา เสตทนฺตา ตวีเม [ตว อิเม (สี. สฺยา. ปี.)], ปโรสตํ เหมชาลาภิฉนฺนา [เหมชาลาภิสญฺฉนฺนา (สี.)];
เต เต ททามีติ สุสีม พฺรูสิ, อนุสฺสรํ เปตฺติปิตามหานํฯ
[26]
กาฬา มิคา เสตทนฺตา มมีเม [มม อิเม (สี. ปี.)], ปโรสตํ เหมชาลาภิจฺฉนฺนา;
เต เต ททามีติ วทามิ มาณว, อนุสฺสรํ เปตฺติปิตามหานนฺติฯ
สุสีมชาตกํ ตติยํฯ
164. คิชฺฌชาตกํ (2-2-4)
[27]
ยํ นุ คิชฺโฌ โยชนสตํ, กุณปานิ อเวกฺขติ;
กสฺมา ชาลญฺจ ปาสญฺจ, อาสชฺชาปิ น พุชฺฌสิฯ
[28]
ยทา ปราภโว โหติ, โปโส ชีวิตสงฺขเย;
อถ ชาลญฺจ ปาสญฺจ, อาสชฺชาปิ น พุชฺฌตีติฯ
คิชฺฌชาตกํ จตุตฺถํฯ
165. นกุลชาตกํ (2-2-5)
[29]
สนฺธิํ กตฺวา อมิตฺเตน, อณฺฑเชน ชลาพุช;
วิวริย ทาฐํ เสสิ [สยสิ (สี. สฺยา. ปี.)], กุโต เต ภยมาคตํฯ
[30]
สงฺเกเถว [สงฺกเตว (ก.)] อมิตฺตสฺมิํ, มิตฺตสฺมิมฺปิ น วิสฺสเส;
อภยา ภยมุปฺปนฺนํ, อปิ มูลานิ กนฺตตีติ [มูลํ นิกนฺตตีติ (สี.)]ฯ
นกุลชาตกํ ปญฺจมํฯ
166. อุปสาฬกชาตกํ (2-2-6)
[31]
อุปสาฬกนามานิ [อุปสาฬฺหกนามานํ (สี. สฺยา. ปี.)], สหสฺสานิ จตุทฺทส;
อสฺมิํ ปเทเส ทฑฺฒานิ, นตฺถิ โลเก อนามตํฯ
[32]
ยมฺหิ สจฺจญฺจ ธมฺโม จ, อหิํสา สํยโม ทโม;
เอตํ อริยา เสวนฺติ, เอตํ โลเก อนามตนฺติฯ
อุปสาฬกชาตกํ ฉฏฺฐํฯ
167. สมิทฺธิชาตกํ (2-2-7)
[33]
อภุตฺวา ภิกฺขสิ ภิกฺขุ, น หิ ภุตฺวาน ภิกฺขสิ;
ภุตฺวาน ภิกฺขุ ภิกฺขสฺสุ, มา ตํ กาโล อุปจฺจคาฯ
[34]
กาลํ โวหํ น ชานามิ, ฉนฺโน กาโล น ทิสฺสติ;
ตสฺมา อภุตฺวา ภิกฺขามิ, มา มํ กาโล อุปจฺจคาติฯ
สมิทฺธิชาตกํ สตฺตมํฯ
168. สกุณคฺฆิชาตกํ (2-2-8)
[35]
เสโน พลสา ปตมาโน, ลาปํ โคจรฐายินํ;
สหสา อชฺฌปฺปตฺโตว, มรณํ เตนุปาคมิฯ
[36]
โสหํ นเยน สมฺปนฺโน, เปตฺติเก โคจเร รโต;
อเปตสตฺตุ โมทามิ, สมฺปสฺสํ อตฺถมตฺตโนติฯ
สกุณคฺฆิชาตกํ อฏฺฐมํฯ
169. อรกชาตกํ (2-2-9)
[37]
โย เว เมตฺเตน จิตฺเตน, สพฺพโลกานุกมฺปติ;
อุทฺธํ อโธ จ ติริยํ, อปฺปมาเณน สพฺพโสฯ
[38]
อปฺปมาณํ หิตํ จิตฺตํ, ปริปุณฺณํ สุภาวิตํ;
ยํ ปมาณกตํ กมฺมํ, น ตํ ตตฺราวสิสฺสตีติฯ
อรกชาตกํ นวมํฯ
170. กกณฺฏกชาตกํ (2-2-10)
[39]
นายํ ปุเร อุณฺณมติ [อุนฺนมติ (สฺยา.)], โตรณคฺเค กกณฺฏโก;
มโหสธ วิชานาหิ, เกน ถทฺโธ กกณฺฏโกฯ
[40]
อลทฺธปุพฺพํ ลทฺธาน, อฑฺฒมาสํ กกณฺฏโก;
อติมญฺญติ ราชานํ, เวเทหํ มิถิลคฺคหนฺติฯ
กกณฺฏกชาตกํ ทสมํฯ
สนฺถววคฺโค ทุติโยฯ
ตสฺสุทฺทานํ –
อถ อินฺทสมาน สปณฺณกุฏิ, สุสิมุตฺตม คิชฺฌ ชลาพุชโก;
อุปสาฬก ภิกฺขุ สลาปวโร, อถ เมตฺตวโร ทสปุณฺณมตีติฯ
3. กลฺยาณวคฺโค
171. กลฺยาณธมฺมชาตกํ (2-3-1)
[41]
กลฺยาณธมฺโมติ ยทา ชนินฺท, โลเก สมญฺญํ อนุปาปุณาติ;
ตสฺมา น หิยฺเยถ [หีเยถ (สี.)] นโร สปญฺโญ, หิริยาปิ สนฺโต ธุรมาทิยนฺติฯ
[42]
สายํ สมญฺญา อิธ มชฺช ปตฺตา, กลฺยาณธมฺโมติ ชนินฺท โลเก;
ตาหํ สเมกฺขํ อิธ ปพฺพชิสฺสํ, น หิ มตฺถิ ฉนฺโท อิธ กามโภเคติฯ
กลฺยาณธมฺมชาตกํ ปฐมํฯ
172. ททฺทรชาตกํ (2-3-2)
[43]
โก นุ สทฺเทน มหตา, อภินาเทติ ททฺทรํ;
ตํ สีหา นปฺปฏินทนฺติ [กิํ สีหา นปฺปฏินทนฺติ (สี. ปี.), น สีหา ปฏินทนฺติ (ก.)], โก นาเมโส มิคาธิภูฯ
[44]
อธโม มิคชาตานํ, สิงฺคาโล ตาต วสฺสติ;
ชาติมสฺส ชิคุจฺฉนฺตา, ตุณฺหี สีหา สมจฺฉเรติฯ
ททฺทรชาตกํ ทุติยํฯ
173. มกฺกฏชาตกํ (2-3-3)
[45]